Begrüßung zum Treffen

Von  Barbara Wagner geb. Wagner

Grüß Gott, ihr Jareker, ihr liewe Leit,
die ihr kumme seid vun nooch un vun weit,
um eich ennanner mol wiedrzusehe,
zu rede mitnanner, sich ufach vrstehe.

Alles in allem, so e Treffe is schee,
mol wiedr so richtich Erinnrunge durchgee.
Was’s Neies gebt, kann mer sich saa,
kann noch dem odr jenem froa.

Vun Jarek vrzähle, dischgeriere dr‘vun,
un unfach nix annres, blos des mol zu tun.
Ja, wann ich so denk, was war des a Spaß,
d‘hum noch in Jarek, in unserer Gaß

Ganz glei, zu wellerer Johreszeit,
mir Kinner, mir hatte halt immer e Freid,
Im Frihjohr, kaum war de Schnee vrgange,
hot's Spiele uff de Gaß ugfange.

Die viele Wasserlatsche hun uns garnet gsteert,
mir ware aa glicklich ganz uhne geteert.
E ganzi Halt ware mer jo immer,
Mäd und Buwe, große un klenner.

In die Schul sei mer jede Tag gange,
des Spiele hot erscht denoch u‘gfange.
Im Summer, wann 's heiß war, am Marascht war's schie kiehl,
do hum mer so gern mit Pappereidel gspielt.

Mir ware mit Dreck, vun Kopp bis zum Fuß.
Drhuam bei dr Motter hot's gewe Vedruß.
Die Almotter hot gscholle, hot awer net gschlaa.
Die Sach war's schun wert, des Schelle zu vrtraa.

Im Herbscht noo, ihr Leit, des war e Zeit,
Ich saa jo, mir hatte immer e Freid.
Am Buhndamm war Treffpunkt, das war e Komplott,
do hum mer immer die Kukruzwä‘ gstoppt.

Mit Stuu unnerlee hun's die Buwe prowiert,
un mir sein als Gotterheit bei de Pipatsche spaziert.
Die Prominze ware gut vun de vrtauschte Kolwe,
nadierlich drhuam, do hun se uns gscholle.

Owends hatte mer e bsunderer Spaß,
mit Schludriwutze sei mer durch die Gass'.
Dann war's Winter, un es war kalt,
Gschlacht is dann worre, un jung und alt
hun mitgholfe, schun morjeds ganz frieh,
so war aa die Sau ball beim Helle noch hin.
Weihnachte is kumme, un's Neijohr war do,
un alli ware mer zufriede so.

Viel Zeit is vrgange, Johrzehnt sein entschwunde
seit jene glückliche, frohe Stunde.
Unser JAREK so weit, unser Heimat so fern,
mir denke zurück, so oft un so gern.
Drum mach ich den Vorschlag, ihr Jareker Leit,
Kummt öfter zum Treffe, vrgunnt eich die Freid.