Das Gedicht gesprochen

Die „Kerweih"


    von Bärbel Wagner, geb. Wagner


Wann's in Jarek Kerweih worre is
Hot‘s erscht mol viel Arwet gewe, sell war gewiss.
Die Weibsleit hun schun Woche vorher mit Bedacht
Iwrleet un sozusaa a Plun gemacht.

Was s am beschte 's erscht wohl mache,
Denn do war wirklich so vieles zu schaffe.
Dort wu die Mäd' un Buwe im Haus ware.
Is die Moddr uf Neisatz gfahre.
Ins Jannis odr ins Märze gange
Un hot a paar Metr Stoff erstanne.
Mit 'm Schneidr un de Nädrn war alles b'sproche
Die hadde wirklich viel zu du in  denne Woche.

Mr hot iwrleet, was mr for a Broadl wert mache,
Was mr zum Backe brauch vor all die Sache.
Un war no endlich 's Bradl beschlosse,
soll mr a Gatsch schtoppe, odr 's vielleicht lose?
Schließlich könnte Gäscht noch kumme.
Ach hätt ich doch liewr glei a Gans genumme!
Die kennte ruhich kumme, des het nix gemacht,
No het mr schnell noch a Kokosch gschlacht.

'S Haus is geputzt worre vun vorne bis hinne,
geweißlt, gemolt vun auße un inne.
Do is die Zeit wie im Flug vegange,
Morjets is mr schun ganz frieh ufgstanne,
Hot gschafft als oft bis in die Nacht tief nei,
denn bis zu d' Kerweih muß jo alles fertich sei.
Am dritte Sunntag im Oktowr war‘ s dann soweit,
die Kerweih war do, for alli a Freid.

Meischtens is mr morjets in de Gottesdienscht gange
Und dann hot mr a Weil uf 'm Kerweihlatz gstanne.
Was war des a Treiwe, ich vegess 's nie.
Noch Keschte hot‘s g'roche, un d'Kalichzuckr war gut,
Alles war luschtich un hat frohe Mut.

S Bradl am Mittag, was war des a Esse
Wie hot des gut g'schmeckt, ich wer‘s net vegesse.
Schun numittags is mr ins Wertshaus gange,
Wu die Mäd in d'Mitte im Kreis sein rumgstanne,
Bis die Musik hot ugfange zu spiele,
Die Walzr, die Polka, die Zeppl die viele,
Dann hun die Buwe s' zum Tanze gholt.
Des hot sich immer un immr wiederholt.

Die Alde drum rum uf de Bank sein gsesse,
Oh, des Bild wird manchr vun uns net vegesse.
Des Tanze is gange bis in anre Tag nei,
Denn schließlich war Kerweih, do durft's halt so sei.

Noch Tage d'noch  un a noch Woche
Hot mr gern vun de Kerweih gsproche,
wie schie des so war, wie luschtich beim Tanze.
'S war ufach gelunge im große und ganze,
Viel Zeit is vegange, Jahrzehnte sein entschwunde,
Seit jene glückliche frohe Stunde.
Die Heimat is weit un Jarek so fern
Mir denke zurück so oft un so gern.